புதிய பதிவர்கள் அறிமுகம் - 4

அற்புதமாகவும், நம்பிக்கையாகவும் எழுதுகிற பலருடைய பதிவுகள் கவனிக்கப்படாமலேயே இருக்கின்றன. இது வருத்தம் மட்டுமல்ல. சாபக்கேடும் கூட. சில புதிய பதிவர்கள் தங்களை திரட்டிகளில் இணைத்துக் கொள்ளாமலும் இருக்கிறார்கள். இந்த அறிமுகத்தின் மூலம், தங்களுக்குப் பிடித்தமான எழுத்துக்களை, பதிவுகளைப் அறிந்து, தொடர்ந்து அவர்களுக்கு ஆதரவளித்து, உற்சாகமளித்திட வேண்டுமென நண்பர்களைக் கேட்டுக் கொள்கிறேன்.

23. கருணா

அற்புதமான வீதி நாடகக் கலைஞர் இவர். ‘பாப்பம்பட்டி ஜமா என்னும் குறும்படத்தின் இயக்குனர். இவரது வலைப்பக்கம் திரை-பறை. சிரிக்கவும், ஆத்திரப்படவும் வைக்கிற இவரது சிந்தனையும் பேச்சும் இப்போது எழுத்து வடிவத்தில் நம்மை நெருங்குகிறது. இவரைப் போன்றவர்கள் வலைப்பக்கம் வரமாட்டார்களா என்ற ஏக்கம் கொஞ்சம் தணிந்திருக்கிறது. இருபது வருடங்களாக எனக்குத் தெரிந்த இவரைப்பற்றி நான் அதிகம் சொல்லக் கூடாது. நீங்களே வாசித்துப் பாருங்கள்.


24. ஆர்.கே.சதீஷ்குமார்
இவரது வலைப்பக்கத்தின் பேர் நல்ல நேரம். கடந்த ஒரு வருடமாக இயங்கி வந்தாலும் 4 மாதங்களாகத்தான் அதிகம் எழுதி வருவதாகச் சொல்கிறார். ஜோதிடராக ஈரோடு அருகில் சித்தோடு என்னும் ஊரில் இருக்கிறார். அவ்வப்போது ஜோதிடம் பற்றியும் எழுதினாலும் பல்சுவையாக எழுதுவதே விருப்பம் என்கிறார். ஜோதிடத்தைத் தவிர்த்து எழுதலாமே என்பது என் கருத்து.


25. சந்தானகிருஷ்ணன்
இவரது வலைப்பக்கம் மதுமிதா. இந்த வருடம் எழுதத் துவங்கிய இவர் இதுவரை நூற்றுக்கும் அதிகமான பதிவுகளை எழுதியிருக்கிறார். தெளிந்த  பார்வை எழுத்தில் இருக்கிறது. இலக்கியம், சினிமா, அரசியல் என சகல பகுதிகளிலும் சிந்தனை செலுத்துகிறார். “ஒவ்வொரு தொலைபேசி அழைப்பிற்கும் சுரக்கின்றன மார்புகள்’ என்னும் இவரது அண்மையக் கவிதை வரிகளைப் படித்துப் பாருங்கள்.

26.சரண்
ஜல்லி என்னும் தலைப்பில் வலைப்பக்கம் வைத்திருக்கிறார். சின்னச் சின்ன அனுபவத் தெறிப்புகளை நகைச்சுவையோடு சொல்ல ஆரம்பித்திருக்கிறார். சரளமான மொழிநடையை ஆங்கிலக் கலப்பில்லாமல் தமிழ்படுத்தினால் இன்னும் சிறப்பாய் இருக்கும்

27.அண்ணாமலைச்சாமி
அண்ணாமலை என்ற பெயரிலேயே வலைப்பக்கம் வைத்திருக்கிறார். 2008லேயே வலைப்பக்கம் தொடங்கி இருந்தாலும் தொடர்ந்து எழுதுவதில்லை. தொடர்ந்து இவரைப் படித்துக் கொண்டு வந்த நான் இடையில் எப்படியோ தப்பவிட்டு இருக்கிறேன். வாழ்வின் அனுபவங்களிலிருந்து, மனிதர்களை சித்திரங்களாக்கும் இவரது கிளிஞ்சல்கள் வரிசை அழகானவை. நம் நினைவுகளைத் தூண்டுபவை.

28. ஸ்ரீஅகிலா
சென்னைதான் இவருக்கு. இவரது வலைப்பக்கம் மல்லிகை. மிகச் சமீபத்தில் எழுதத்துவங்கிய இவர் மூன்று பதிவுகள் எழுதியிருக்கிறார். ரசிக்கவும், நெகிழவுமான எழுத்து இவருடையது. அவருடைய குட்டி தேவதைகள் அருமையான பதிவு.

பதிவர்களுக்கு வாழ்த்துக்களைச் சொல்லி வரவேற்போம். ஆதரவளிப்போம்.
(புதிய பதிவர்கள், தங்கள் வலைப்பக்க முகவரி, தங்களைப் பற்றிய சிறு குறிப்புகளைjothi.mraj@gmail.com என்னும் மின்னஞ்சலுக்கு அனுப்பினால் தீராத பக்கங்களில் அறிமுகப்படுத்த முடியும்.)