லத்தீன் அமெரிக்கா : நம்பிக்கையின் கீற்று

அவர்கள் கப்பலில் வந்தார்கள்
அவர்கள் கைகளில் பைபிள் இருந்தது
எங்களிடம் நிலம் இருந்தது
கண்ணை மூடி பிரார்த்திக்க சொன்னார்கள்
பிரார்த்தித்தோம்
கண்ணைத் திறந்தோம்
எங்களிடம் பைபிள்
அவர்களிடம் நிலம்!

இந்தக் கவிதையோடு ‘லத்தீன் அமெரிக்கா : நம்பிக்கையின் கீற்று’ என்னும் புத்தகம் ஆரம்பமாகிறது. கி.பி 1492ல் இந்தியாவைத் தேடிப் போன கொலம்பஸ் அமெரிக்கக் கண்டத்தில் கால் வைத்ததிலிருந்து வேதனை கொப்பளிக்கும் ஒரு நிலப்பரப்பின் வரலாற்றை 72 பக்கங்களில் சுருக்கமாகவும், சுவராஸ்யமாகவும் தந்திருக்கிறார் விஜயசங்கர். 

இன்று  ஒங்கி உயர்ந்து நிற்கும் அமெரிக்கக் கட்டிடடங்களின் அஸ்திவாரம், கூட்டம் கூட்டமாய் கொன்று குவிக்கப்பட்ட செவ்விந்தியர்களின் எலும்புகளால் எப்படி கட்டப்பட்டது என்பதைப் படிக்கும்போது நடுக்கமாய் இருக்கிறது. ஆயுதம் என்றால் என்ன்வென்று அறியாமல் இயற்கையின் மடியில் சுதந்திரமாய்த் திரிந்த செவ்விந்தியர்கள், ஸ்பானியக் கொள்ளைக்காரர்களின் குதிரைகள் மற்றும் வாட்களின் முன்பு மண்டியிட்டு நின்ற கணத்திலிருந்து பூமியின் வரலாறு வேறுவிதமாய் எழுதப்பட்டதைச் சொல்கிறது இந்த புத்தகம்.

அந்த மண்ணின் பூர்வ குடி மக்களைக் கொன்றும், அங்கிருந்து தங்கத்தையும் இயற்கை வளங்களையும் ஐரோப்பாவுக்குச் சூறையாடிச் சென்ற  நூற்றாண்டுகளின் மனித அலறல்கள் புத்தகத்திலிருந்து நமக்குக் கேட்கிறது. ஆங்கிலேயர் புலம்பெயர்ந்து பூர்வகுடிகளை விரட்டிய வட அமெரிக்கப் பகுதிகள் ‘ஆங்கில அமெரிக்கா’ என்றும், ஸ்பானியர்கள் ஆக்கிரமித்த தென் அமெரிக்கப் பகுதிகள் லத்தீன் அமெரிக்கா என்று அழைக்கப்படுகின்றன. தோட்டங்களில் வேலை செய்ய ஆப்பிரிக்காவிலிருந்து நீக்ரோக்களை அடிமைகளாக கொண்டு வந்த அடுத்த துயரம் நிரம்பிய காட்சிகள் ஆரம்பிக்கின்றன.அமெரிக்கா மெல்ல மெல்ல ஆதிக்கம் பெறுவதும், ஏகாதிபத்தியத்தின் மையம் வட அமெரிக்காவில் நிலை கொள்ளும் அத்தியாயமும் சொல்லப்படுகின்றன.

அமெரிக்க ஏகாதிபத்தியத்திற்கு எதிராக கியூபா, வெனிசுலா, அர்ஜெண்டினா, பிரேசில் என ஒவ்வொரு லத்தின் அமெரிக்க நாடுகள் விழித்துக் கொண்டு தலைதூக்கிப் பார்ப்பதோடு புத்தகம் முடிவடைகிறது. “பத்தொன்பதாம் நூற்றாண்டும், இருபதாம் நூற்றாண்டும் ஐரோப்பா மற்றும் அமெரிக்காவின் நூற்றாண்டுகளாய் இருந்தன. ஆனால், இந்த நூற்றாண்டு ஆசியா, ஆப்பிரிக்கா மற்றும் லத்தீன் அமெரிக்காவுக்குச் சொந்தமானது.” என்று சாவேஸின் குரல் உலகை நம்பிக்கையோடு திரும்பிப் பார்க்க வைக்கிறது. அற்புதமான மொழியில், நெரூடாவின் கவிதைகளோடு வரலாறு சொல்லப்பட்டு இருக்கிறது.

புத்தகம் கிடைக்குமிடம் : 

பாரதி புத்தகாலயம், 

7,இளங்கோ சாலை, 

தேனாம்பேட்டை, 

சென்னை -18.