வலைப்பக்கத்தில் எழுத்தாளர் ச.தமிழ்ச்செல்வன்!

எழுத்தாளர். தமிழ்நாடு முற்போக்கு எழுத்தாளர் கலைஞர்கள் சங்கத்தின் பொதுச்செயலாளர். பூ படத்தின் கதையான ‘வெயிலோடு போய்’எழுதியவர்.அறிவொளி இயக்கத்தில் முன்னணித் தொண்டர். தொழிற்சங்கவாதி. பண்பாட்டுத்தளத்தில் தொடர்ந்து பணியாற்றும் செயல்வீரர். முன்னாள் இராணுவ வீரர். பிறகு தபால்துறை ஊழியர். இப்படி பல பன்முகங்களும், பரிமாணங்களும் அவரது வாழ்வில் உண்டு. இவையெல்லாவற்றையும் தாண்டி அற்புதமான மனிதராக நான் பார்த்துக் கொண்டு இருக்கிறேன்.

பாய்க்குப் பேர் போன பத்தமடையில் இருக்கும் அவரது இல்லத்திற்கு பலமுறை சென்றிருக்கிறேன். அவரே அருமையாக சமைப்பார். பேச்சில் மிக இயல்பான நகைச்சுவை எப்போதும் இருக்கும். எதையும் மிக தெளிவாக யோசிக்கிறவர். மிக நெருக்கமான நண்பர் என்பதில் எனக்குப் பெருமை. தமிழ் இலக்கிய உலகம் நன்கு அறிந்த அந்த எழுத்தாளரை சமீபகாலமாக ‘வலைப்பக்கம் வாருங்கள், அதற்கென நேரம் ஒதுக்குங்கள்’ என நச்சரித்துக் கொண்டிருந்தேன். எப்போதும் பயணம் செய்து கொண்டே இருக்கும் அவரை, இங்கேயும் அற்புதமான மனிதர்களும், சிந்தனையாளர்களும் இருக்கிறார்கள் என கைகாட்டிக் கொண்டிருந்தேன். இப்போது சம்மதித்து வந்திருக்கிறார். அவருக்கென ஒரு வலைப்பக்கத்தை உருவாக்கிக் கொடுத்த பெருமை எனக்கு கிடைத்திருக்கிறது. இங்கே தமிழ்வீதியில் இழுத்து வந்து விட்டிருக்கிறேன்.

உயிர்மையில் அவர் எழுதிய ‘விடுபட்ட சொற்கள்’தொடரை தமிழ் இலக்கிய உலகம் உன்னிப்பாகவும் உற்றும் கவனித்தது. வலைப்பக்கத்தில் அவர் பேசுவதை தமிழ் வீதியில் உங்களோடு சேர்ந்து கேட்க காத்திருக்கிறேன்.

அதற்கு முன், வலைப்பக்க நண்பர்கள் நாம் அவரை வாழ்த்தி வரவேற்போம்.

இனி அவர்-

 

*