வம்சி நடத்தும் பதிவர்களுக்கான சிறுகதைப் போட்டி!

பத்திரிகைகளில் எழுதப்படும் பல சிறுகதைகளை விடவும் அருமையான சிறுகதைகளை வலைப்பக்கங்களில் நமது பதிவர்கள் எழுதி வருகிறார்கள். உள்ளடக்கத்திலும், வடிவ நேர்த்தியிலும், மொழியைக் கையாளுவதிலும் அவை சிறப்பானவையாக இருக்கின்றன. நிர்ப்பந்தகளும், வியாபாரத்தன்மைகளும் அற்று, மிக சுதந்திரமாக எழுத முடிகிறது இங்கே. பலரின் கண்பார்வையில் படாமலேயே பொக்கிஷங்களாய் அவை  கொட்டிக் கிடக்கின்றன. அவைகளை சேகரிக்க மீண்டும் முன்வந்திருக்கிறது வம்சி பதிப்பகம். இந்த தடவை ‘சிறுகதைப் போட்டி’ என நடத்துவதன் மூலமாக.

இதைப் போட்டி எனச் சொல்வது சரியாயில்லைதான். சிறந்த கதைகளைத் தேர்தெடுப்பதற்கான உத்தியாகவே இதனை அர்த்தம் கொள்வோமாக!  தேர்தெடுக்கப்படும் முதல் சிறந்த சிறுகதைக்கு ரூ.10000/-மும், இரண்டாவது சிறுகதைகள் இரண்டிற்கு தலா ரூ.5000/-மும் கொடுக்க வம்சி பதிப்பகம் முன்வந்திருக்கிறது.

மேலும், நல்ல சிறுகதைகளை தேர்ந்தெடுத்து சிறுகதைத் தொகுப்பாய் கொண்டு வருவது எனவும், அப்படி தொகுப்பிற்காய் தேர்ந்தெடுக்கப்படும் கதைகள் ஒவ்வொன்றிற்கும் தலா ரூ.1000/- கொடுக்கவும் தீர்மானித்திருக்கிறது.

இந்தக் கதைகளைத் தேர்தெடுப்பதற்கான நடுவர் குழுவில், தமிழின் முக்கிய எழுத்தாளர்கள் இருக்கலாமே என்றேன். வம்சி பதிப்பகத்தின் சார்பில் பேசிய பவா செல்லத்துரை கொஞ்சமும் தயங்காமல் எழுத்தாளர்கள் பிரபஞ்சன், நாஞ்சில் நாடன், தமிழ்நதி ஆகியோர் பேர்களைச் சொன்னார்.

பதிவுலக நண்பர்கள் இந்த முயற்சியில் கலந்துகொண்டு, வலையுலகில் இருந்து தமிழுக்கு அற்புதமான சிறுகதைகளைத் தந்து உதவுமாறு கேடுக் கொள்கிறோம்.

கவனத்தில் கொள்ள வேண்டியவை:

1. 2011ல் எழுதிய சிறுகதையாக இருத்தல் வேண்டும்.
2. சிறுகதை எழுதியவர்கள் கண்டிப்பாக பதிவர்களாக இருத்தல் வேண்டும்.
3. சிறுகதைக்கான பதிவின் இணைப்பைத் தந்தால் போதுமானது.
4. பதிவர்கள் மட்டுமல்லாது, கதையை ரசித்தவர்களும் இணைப்பை அனுப்பலாம்.
5. ஒருவர் எத்தனை சிறுகதை இணைப்புகள் வேண்டுமானாலும் அனுப்பலாம்.
6. அனுப்ப வேண்டிய கடைசி தேதி:  31.10.2011 . அனுப்ப வேண்டிய முகவரி : jothi.mraj@gmail.com

 

* 30.11.2011 அன்று சிறுகதைப் போட்டி முடிவுகள் அறிவிக்கப்படும்.

* போட்டியில் தேர்தெடுக்கப்பட்ட சிறுகதைகளின் தொகுப்பு 2012 ஜனவரியில் நடக்கவிருக்கும் சென்னைப் புத்தகத் திருவிழாவையொட்டி வெளியிடப்படும்.

 

வாழ்த்துக்கள்!